kenesh.org

 
  • Увеличить размер шрифта
  • Размер шрифта по умолчанию
  • Уменьшить размер шрифта
История

Людмила Айтуганова

Мӧйы журналмылэн пинал дырыз

 

"Кенеш" журнал сярысь лыдӟисьёс нырысьсэ тодӥзы "Гудыри" газет пыр. 1926-тӥ арын 14-тӥ тулыспалэ (феврале) потэм номераз сётэмын вал таӵе ялон: "Февраль толэзьысен кутскыса, толэзьлы быдэ одӥг пол удмурт кылын журнал "Кенеш" потылоз. Нырысетӥ номерез Удмурт областьлэн 5 ар тырмон нуналаз (Удмурт автономилэсь нуналзэ соку 28-тӥ феврале пусйыло вал) потоз". Та ялонын ик пусъемын вал выль журнал азе пуктэм ужпумъёс: "Удмурт журналэ политика ужез, ваньбурен улонэз, гожъяськонэз шонертон, удмурт кылэз волятон но мукет кулэ ужъёс сярысь гожъялозы". Та кылъёс "Кенешлэн" нырысетӥ бамаз ик котькуд номераз гожтыса сётэмын луо вал. Озьы 9-тӥ номерозь. Талэсь куштӥськизы, феврале потэм 10-тӥ номерысен кутскыса, кык ар ортчыса гинэ. Нош журналлэн нырысетӥ номераз лад-лад валэктэмын вал, малы та удысъёсты быдэсъян понна кулэ луиз "Кенеш" нимо журнал. Кылсярысь, отын шуэмын, "та ужъёс сярысь трос муртъёсын кенешылоно" луоз. Малы ке шуоно, "малпанъёсмес куспамы огмылы огмы верано. Трос йырын огъя кенешыса, ужъёсты шонер, ярамон лэсьтыны быгатом". Нош озьы "кенешыны весяклы огазе люкаськыны нокызьы но уг луы, гожъяса гинэ огмылэсь огмы малпанъёсмес тодыны быгатом. Соин ик та чакламъёсмы сярысь куспамы кенешон понна та "Кенеш" нимо журнал потэ".

Валамон ини, та кенешоно ужпумъёс тросэз герӟаськемын вал литератураез будэтон ужпумъёсын. Ортчем аръёс пыр чакласькод ке кылбур-верос гожъясьёслэсь со вакыт улон ӧрзэс, йӧтскиськод ке ӝужась литературалэн ёзъёсыз борды, валаськод, макем трос ӟечсэ лэсьтыны быгатӥз "Кенеш" журнал потыны кутскем бераз нырысь аръёсаз ик (1926—1928-тӥ аръёссэ басьтыса). Гожъясьёслэсь нимъёссэс гинэ но лыдӟыса ырак луоно — кӧня дано, кӧня быгатӥсь но кӧня егит адямиос, литературае рос-прос сюрес утчасьёс: К. Герд, Ашальчи Оки, Айво Иви, М. Ильин, Д. Баженов, И. Дядюков, С. Бурбуров, Багай Аркаш (А. Клабуков), Уӵы (И. Соловьёв), П. Реймит (Кедра Митрей), Ф. Александров, Т. Шмаков, Гави Йыги (Игнатий Гаврилов), Очко Санко (А. Эрик) но трос мукетъёсыз. Таӵе кужымез шӧдыса ик, К. Герд гожтӥз, дыр, удмурт литературалэн азьлапал сяськаяськонэзлы оскон кылъёссэ: "Асьмелэн литературамы ошмес на али. Тани пинал калык но со ошмесэ тулыс ву кадь ик пыре ини. Кӧня ке ар улыса, со ошмес шур луоз. Ву огинтыяз уг улы, улон но азьлань кошке: шур туж паськыт кам луоз, со паськыт кам синмын сузёнтэм бадӟым зарезь мед луоз. Удмурт калыклэн но поэзиез, литератураез мукет калыкъёслэн син азязы йӧтымон мед луоз. Талы оскыса, нош ик выльысь ужалом!" ("Удмурт литературалэн сяськаяськон сюресэз" — "Кенеш", 1926, 2-тӥ №, 11-тӥ бам).

Поттэм веросъёсыныз но кылбуръёсыныз "Кенеш" журнал зэмзэ но пыӵатыны быгатэ вал таӵе бадӟым оскон: удмурт литература но ӝоген йӧн-йӧн пыд йылаз султоз, аслэсьтыз чеберзэ, узырзэ, ӟечсэ мукет калыкъёслы возьматоз. Тани Ашальчи Окилэн гожъямъёсыз. Соос геройёслэсь лул дуннезэс, мылкыдъёссэс но малпанъёссэс сокем быгатыса суредало, геройёсын ӵош лыдӟись но улыны кутске кадь. Шуом, "Онисьлэн шудэз" вероссэ лыдӟыку, Онисен ӵош ӝӧк вылысь пуштэм шоры шокатэк учкиськод кадь: "Онись пуштэм вылысь синзэ уг басьты. Куноос кошкем бере сиё шуыса буйгаса кема ӧз улы. Пуштэмлэн дурыз котыр кулэсмем бере сюлмыз огак шымыртӥське: "вань пуштэмез сиизы ке бо!" — Вылтырыз кезьыт луыса кошке. Тани нош Палсин Ондрей Онисьлэсь пуштэмзэ омыртӥз. Вань меда гуртын со кадь адӟонтэм адями?.."

Яке басьтом Г. Медведевлэсь "Сютэм ар" вероссэ. Таиз но веросчи туж валаса но оскымон пуктэм сютэм муртъёслэсь курадӟон эсэпсэс, сиемзы потыса жуммон калэ вуэмзэс но вань кӧшкемыт адӟонъёссэс...

Шуныт кыл вераны луоз журнал бамысь кылбуръёс сярысь но. Зэм, пӧлазы тросгес югдытон ужъюгдурлы тупатыса кылдытэмъёсыз, соос но кулэ вал уго ас дыраз. Чеберлыклэн куронъёсызъя радъям чуръёс но вань. Соос ик оскон кылдытъязы, удмурт поэзия но ас ӝуждалазэ, ас мурдалазэ шедьтоз шуыса. Тани, чаклалэ ай:

Инмын ӝуало кизилиос.

Ӝуало... Ворекъяло...

Толэзен лушкем верасько соос,

Верасько... Дырекъяло...

(К. Герд. Инмын ӝуало кизилиос...)

 

Урод кезьыт тол куазед

Тулыс куазен воштӥськиз,

Капчи каньыл мылкыдэз

Коркась кыре кисьтӥськиз...

(М. Ильин. Тулыс дыр)

Но таӵе гожъясьёсты будэтон понна трос сюлмаськем, тыршем кулэ. Малы ке шуоно ваньзы сямен удмурт веросчиос но кылбурчиос гуртъёсысь потэмын, пеймытын улыны дышем анай-атайёслэн нылпиоссы. Иське, нырысь ик малпаськоно, соос классика вылын тодон-валанъёссэс мед узырмытозы шуыса. Та сярысь сюлмаськыса ик С. Бурбуров гожтэ: "Ӟуч литератураен тодматскытэк, солэсь дышетскытэк, ӝужась удмурт литературалэн азьлане вамыштэмез ноку но уз луы. Соин ик асьме удмурт кылбурчиосмылы ӟуч литератураен ӟеч-ӟеч тодматсконо: ӟуч литературалэсь сюрессэ, азьлане вамыштэмзэ сэрттыса-пертчыса эскерыны кулэ". Статьяяз со тодматэ ӟуч писательёслэн огазеяськемъёсынызы. Тросэз пӧлысь со висъя попутчикъёсты — "векчи буржуй шӧмо писательёсты", пролетар писательёслэсь организациоссэс (РАПП, "Кузница"), кунгож сьӧры кошкемъёсты, буржуй писательёсты ("Ӟуч писательёслэн огазеяськемъёссы" — 1928, 18-тӥ №, 21-тӥ бам).

Удмурт писательёсты будэтон ужлы ӟеч юрттэт луо кружокъёс. Тае шӧдыса, "Кенешлэн" 17-тӥ но 18-тӥ номеръёсаз "Литературной кружокъёслы" дэмланъёс потыны кутско. Отын сётэмын таӵе "кылсярисьем" план — ужан план. "Мар со литература", "Газетэ гожъян", "Кылбуро литература", "Туала литература", "Бадӟым писательёс (классикъёс)", "Удмурт литература" но "Кылбур-веросъёсыз дунъян". Котькуд люкетэз борды лыдӟыны ужъёс ӵектэмын. Кылсярысь, "Кылбуро литературая" лыдӟыны кулэ, пе, Багайлэсь "Кызьы гожъяно верос ("Гудыри", 1928, 12-тӥ №), "Дышетскоме верос гожъяны" ("Гудыри", 1928, 17-тӥ №), "Озьы меда" ("Гудыри", 1926, 53-тӥ №), "Кылбур-веросъёсыз курласа дунъямлы ӝожконо-а?" ("Гудыри", 1928, 75-тӥ №), "Кылбур гожъян" ("Гудыри", 1928, 18-тӥ №) статьяоссэ но Шенгелилэсь "Как писать статьи, стихи и рассказы" книгазэ.

"Кенешлэн" 18-тӥ номераз план вӧзы валэктонъёс сётъямын: "Мар сярысь вераськоно литератур кружокын нырысь ик", "Мар лыдӟоно" но "Кенеш ортчытон сярысь кӧня ке кыл. Вань та дэмланъёс зэмос бадӟым юрттэт вал шуыны луоз кызьы ке кружокъёсын кивалтӥсьёслы, озьы ик кружоке ветлӥсьёслы но. Угось литературае пырыны дасяськись мурт та дэмланъёсысь литература сярысь но, гожъяськон сярысь но тырмыт тодон-валан басьтыны быгатылӥз.

Писательёсты будэтон ужрадъёс пӧлы ик пыре "Кенешлэн" "Пуж пыр" сэрегез. Татын тодмо кылбур дунъясьёс редакцие вуэм чуръёс сярысь ас малпанъёссэс верало. Валэкто, малы соиз яке таиз кылбур пӧрмымтэ, кыӵе шекъёсыз вань, маиз бордын ужано на сое ӟеч кылбур карон понна. Тани Багай Аркаш вераны тырше авторъёслы, кылбуръёссылэн лябзы ӵемысь вуж образъёсты, кылъёсты, рифмаосты но размеръёсты уже кутэм бордысь потэ шуыса. Гави Йыгилэсь со шедьтэ "дуриськом выль улон", "зӧк кӧтъёслэсь, попъёслэсь ӧвӧл табре курданмы", "вир юись калыкъёс", "сюпсизы виръёсыз" но мукет вужмем образъёссэ. "Та ваньмыз кезьыт, кынмем веранъёс Дырыз дыръя (революци нуналъёсы)  таос но сюлме йӧто вал, — дышетэ со, — пӧсьсы вал, табере быриз, табере мылкыд лапкомиз: сое виль пӧртэм пӧсь кылъёсын ӝуткано" (15-тӥ №, 27-тӥ бам). Нош Очко Санколэн чуръёсысьтыз со пусъе туж ӵем кутӥськись кылъёссэ: "син усьтон", "пеймыт удмурт", "шунды ӝужан" — "ваньмыз та кылъёс виль ӝужась кылбурчиослэн кыл йылазы туж ӵем ватсасько. Сюлэмлы номыр верасьтэм кылъёс. "Синъёсты усьтоно" шуыса гинэ ужмы уг быдэсмы веть. Со синъёсыз калыклы усьтыны юрттоно. Кылбурчилэн со ужез пӧсь кылын быдэстэмез луоз" (15-тӥ №, 27-тӥ бам).

18-тӥ номераз "Пуж пыр" сэрегын, редакцие вуэм кылбуръёслы дунъет сётэм сяна, Йыгын Курбат удмурт литература пумысь висёнъёссэ но шарая: "Лыдӟись калык туж зол будэ, — гожтэ со. — Азьлон со гожтэтлэсь сюлэм пушсэ, кылзэ, устолыксэ, чеберлыксэ ӧз ке чакла, табере со бырйиське ини". "Удмурт писательёсмы бере кылё, — шуэ со, — соин ик удмуртэз (али ӟуч книгаез лыдӟисез) удмурт книга борды бинялтон понна, та вадес удмурт литературалэсь устолыксэ, чеберлыксэ ӝутоно".

Удмурт литературалэсь устолыксэ ӝутон ужрадъёс но палэнэ ӧз кыльылэ — номерысь номере кыӵе ке но выль потэм чеберлыко книга сярысь ивортон яке дунъян кыл сётылэмын вал. Тани нырысетӥ номерзэ ик учким ке, отысь шедьтом Д. Баженовлэсь И. Михеевлэн 1925-тӥ арын Москваын потэм "Удмуртъёслэн революци потон азьын улэмзы" пьесаез сярысь дунъяса гожтэмзэ. "Нимыз та книгалэн удмурт, пушкыз ӝыныезлэсь тросэз ӟуч кылын гожтэмын, — кутске со дунъян кылзэ. — Сюлэмез ке ӟеч луысал, со, вылды,  ӧй люкетысал. Гожтӥсез та книгаезлэсь сюлэмзэ али улон котыре пыриськытыны малпа вылэм", — азьланьтэ со, — но та малпанзэ, пе, ӟеч быдэстыны быгатымтэ. Баженов книгалэсь авторзэ пыкылэ революционерлэсь, большевиклэсь туссэ умойтэмен возьматэмысьтыз. "Партилэсь программазэ вӧтаз но адӟымтэ бере, шуэ со, революционерлэсь ужзэ валамтэысь ик потэ солэсь "ӟеч, гажано нимзэ дэрие куштон".

3-тӥ номерын Д. Баженовлэн ик потэмын "Кузебай Герд, солэн берпум кылбуръёсыз" нимо статьяез. Та пумысь редакция валэктон кыл гожтэ: "Удмурт литератураез, удмурт поэзиез ас дунэзъя дунъян дыр вуиз ини. Озьы дунъян ужлы та гожтэменыз Баженов эш кутскон ныр понэ. Соин ик та гожтэтэз "Кенеше" пыртӥськом".

Зэмзэ но Баженовлэн та статьяез удмурт поэзимес "ас дунэзъя дунъян" ужлы кутскон сётэ. Гердлэсь кылбуръёссэ со чакла калыклэсь улон-вылон мылкыдъёссэ, улонысьтыз ортчись воштӥськонъёссэ макем ӟеч возьматыны быгатэмезъя: "Быдэсак Гердлэн кылбуръёсыз сярысь вераса, та кылбуръёс туж чебер, туж ярано кылбуръёс. Калыклэсь малпанзэ, та вие улонэз туж шонер возьмато. Будӥсь калыкез но выль сямен улыны дасяло. Выль улон сямъёслэн малпанзы борды вазькыса кылбуръёсыз гожтэмын." Татын ик Баженов кылбурчилэсь кылбур радъян пӧртэмлыксэ возьматэ. Герд, пе, суредъёс пуктыны быгатэ, "напчытэм суредъёсыз но вань", "удмурт калыкез чеберлы валэктыны, чеберез яратыса будэтыны, улонэз тодытыны та кылбуръёс ярало".

Кузебай Гердлэн ик кылбуръёсызлы "Гольтрес сяська" нимын дунъян кыл гожтэм "Кенешлэн" 9-тӥ номераз мукетыз автор — Эльбай Лёва (А. Клабуков). Таяз учыре тросгес саклык висъямын ини кылбурчилэн кыл-куара радъян пӧртэмлыкезлы. "Та книга — кисьмам кылбурчилэн книгаез", нош "кинлы сётэмын, солэсь трос курозы" шуыса, Эльбай Лёва Гердлэсь кылтӥрлыксэ вылӥ мертэтъёсъя эскере. Выль улонэз со "туж паськыт бурдъяськыса возьматэ", соин ик "улонмылэсь вылзэ гинэ возьматэ, сое но горд пияла пыр гинэ".  "Гердлэн кужымезъя тае пыдлогес гожтыны луысал", пе. Улонэз вылтӥз гинэ "горд пияла пыр" возьматэменыз ик кылбуръёсаз со трос кутэ "митинго кылъёсты" но "оглом кылъёсты". "Ортчыт огпӧртэм" гожъямъёсызлэсь но, пе, "вукак потоно". Рифмаоссэ но, шуэ кылбур дунъясь, чеберъяны уг сюлмаськы: "Куд-куд чуръёсаз рифмаосыз чик уг кылӥсько... Одӥг кадь кылъёсыз но рифма каре... Глагол рифмаосыз но туж уно. Со вуж ини туэ. Кудӥз-огез ньыльчуръёсыз одӥг рифмаен ортчо..." Оглом вераса, та дунъян Гердлэн кылбуръёсыныз котыр ласянь тодматыны тырше: улонэз кыӵеен возьматэменыз но, сое кызьы усьтэменыз но.

Таӵе бадӟым статьяос вӧзын, кудъёсаз кылбурчиослэн аспӧртэмлыко гожъяськон манерзы, поэзизылэн улонын интызы сярысь вераськон ӝуто, "Кенешын" трос пото пичиесь кылбур дунъян кылъёс. Таосыз ини кылдытэмын, шуыны луоз, выль книгалы дуннее ӧс усьтон понна. Угось соос иворто книгалэн нимыз, авторез сярысь, вакчияк пусъё пуштроссэ. Ӵемысь ивортон висказ ивортӥсь ас малпанъёссэ но гожтэ: маиныз книга кельшиз, кыӵе шекъёсыз син шораз йӧтӥзы, пайда басьтоз-а лыдӟись, тае лыдӟиз ке. Нырысь-валысь выль книгаос сярысь веранъёс сётэмын луо вал "Книга ӝажы" сэрегын (2-тӥ №; 3—4-тӥ №); берло соосыз поттылон понна "Удмурт книгаосыз дунъян" сэрег усьтӥськиз. Паймоно: "Кенеш" макем ӝог но дыраз выль книгаосыз синйылтылэм но соос сярысь вераны вуылэм! Собере тыршылэм но, лэся, ваньзэ адӟыны, одӥгзэ но кельтытэк вераны. Кылсярысь, 13-тӥ номерын гинэ 7 книга сярысь дунъян кыл пыртэмын: "Сюрес дурын" — Ашальчи Окилэн кылбуръёсыз; "Югыт нуналъёс" — Д. Майоровлэн гожтэмез; "Володя" — К. Яковлевлэн гожтэм веросэз; "Вожо" — Е. Евсеевлэн веросэз; "Дэмен уж" — П. Усковлэн гожтэмез; "Ужаса дышетскон мылкыд" — Ларионовлэн гожтэмез но "Нотаен удмурт кырӟанъёс". Нош И. Яковлевлэн "Вормонтэм батыр" поэмаез сярысь малпанъёс кык номерын потӥллям — 16-тӥ но 17-тӥяз.

Тужгес пусйыны кулэ на созэ: "Кенеш" общественно-политической но литературно-художественной журнал луоз шуыса малпамын вал бере, со туж трос но шумпотыса печатла кызьы ке йӧно писательёслэсь, озьы ик али ӝужасьёсызлэсь но кылбуръёссэс, веросъёссэс, очеркъёссэс но малпанъёссэс. Валамон ини, сокем трос авторъёслэсь произведениоссэс поттыны сюлмаськон литературалэн ӝужан вакытаз туж кулэ ужрад луэ. Угось гожъяськисьёслы луонлык кылдэ аслэсьтыд ужъёстэ эшъёсыдлэн ужъёсынызы ӵошатыны, ас кужымдэ мукетъёслэн кужыменызы мертаны.

Оглом вераса, "Кенеш" журналлэн потыны кутскемез, ужамез туж пайдаё луизы литературамы понна. Вань та вылӥ верам ӧръёс, кудъёстӥз радъямын вал литераторъёсын но лыдӟисьёсын кусыпъёс, удмурт литературалы ас куаразэ, ас кужымзэ шедьтыны юрттӥзы. Со сяна, дасямын вал ни выль ӝужась авторъёслы ӟеч-ӟеч азинскем литературае тубыны юнэсь но вольытэсь лёгетъёс, усьтэмын кыдёкысьёсызгес инвисъёс... Сотэк уго литературалы азинскыны, будыны туж шуг луысал. "Кенешын" сыӵе учконъёс, мылкыдъёс, малпанъёс но дунъянъёс авторез вӧсь карыны тыршисьтэмесь, каньыл мылкыдоесь, визь-кенеш сётыны сюлмаськисесь гинэ вал. Ог-огед азьын батыръяськон, лек мылкыдын вожвылъяськон яке пож ву кисьтан солэн нырысетӥ номеръёсаз чик уг адӟисько на. Таӵе чебер, каньыл ужан сямзэ, удмуртлыксэ вунэтыны ӧдъяз ни журнал бератазгес, кызь укмысэтӥ-куамынэтӥ аръёсы, соку, куке калыклэсь улон-вылонзэ "вылӥос" огыр-бугырмытыны кутскизы колхозъёс но совхозъёс кылдытонэн валче. Удмурт литературалэн огсыр азинсконэзлы могӟетъёс кылдытыны туж бадӟым муг луиз нимо-дано луэм "Лудорвай уж". Лудорвайын со уж луиз, пе, гуртын "кулак кенеш" кузёяськемен. Та дырысен "кенеш" кылэз тышкаськон кыллы пӧрмытӥзы. Отӥяз, кызьы тодӥськомы, со кыл куштэмын вал журнал вылысь но. 1931-тӥ арысен ини со потаны кутскиз андан кадь чурыт но кезьыт нимын: "Пролетар кылбурет удысын". Удмурт лул-сюлэмлы тупась "Кенеш" нимын потонзэ журналмы 1990-тӥ арозь возьмано луиз.

( "Кенеш", 1996, 1-тӥ №, 11—14-тӥ бамъёс).